Alonso Montero achéganos á obra literaria e á biografía de Delgado Gurriarán na terra, na guerra e no exilio, moi condicionada por acontecementos adversos, onde, nese longo período, o poeta corgomés mantivo sempre ergueita a súa dignidade e o seu compromiso cos ideais que abrazara de mozo.
Coa súa poética cantou a paisaxe e os froitos báquicos de Valdeorras, e desde a súa preocupación polo idioma tamén se debruzou sobre el para compoñer unha serie de sentidos poemas sociolingüísticos, insólitos no seu tempo, á vez que cultivou a sátira e os poemas elexíacos.